Agora que son les 6:30 h d'esti martes, alborecemos con cielu empercáu de nubes altes, delles nublines no fonderu los valles ya con unes temperatures que tan alrodiu de los 12ºC, rexistrándose nel puirtu Payares 10,5ºC.
Güei col role del vientu a componente norte a partir del mediudía va dir tapeciéndose'l cielu de nubosidá baxa que vendrá acompangada de precipitaciones febles en forma d'orpín pero eso yá sedrá pela tarde. Les temperatures másimes en bultable descensu, sobre too nel interior y zones altes d'Asturies.
Mañana miércoles dirá escamplando a lu llargu la mañana cola apertura de dellos claros o abancios con unes temperatures que van camudar poco ya col aire nordés que pue ser dalgo cafiante nel llitoral nes hores centrales del día, faciendo baxar la sensación térmica peresa fastera.
El xueves tendremos intervalos de nubes medies y altes entemecies ente dellos claros con unes temperatures másimes que tenderán a subir, algamándose de nuevu los 20ºC en dellos puntos d'Asturies.
El vienres les nubes baxes dirán ganando terrén de norte a sur pa dexanos el cielu nublo percompletu, sitaución que pue estendese al restu la fin de selmana con un descensu de les temperatures másimes.
De momentu nun se ven lluvies d'importancia a ningún plazu, seguimos baxo esta situación de seca.
