Editorial: nun nos damos

Güei, 7 de mayu de 2026 y coincidiendo cola 47 Selmana de les Lletres Asturianes, facemos anuncia del nacimientu de 7dies.org, un mediu de comunicación íntegramente n’asturianu. L'ausencia d’una plataforma de comunicación na llingua propia del país yera una necesidá clamorosa énte un vacíu innegable. Una comunidá llingüística con miles de falantes, empreses, escritores, llectores, asociaciones, músicos, artistes, families, militantes y un universu, al fin, encontiáu alredor del idioma asturianu nun podía permanecer más tiempu ensin una plataforma de comunicación propia.

Detrás de la web 7dies.org nun s’alcuentra una empresa, atópase’l proyeutu cultural 7Díes. L’oxetivu d’esti proyeutu cultural ye’l de xenerar conteníu diariu n’asturianu al públicu xeneral y contribuyir con ello a la normalización y divulgación del idioma y a la promoción de la cultura asturiana. El formatu que va emplegar ye únicamente dixital y les diez seiciones coles qu’arranca pretenden cubrir suficientemente la información del país.

7dies.org quier reclamar la soberanía llingüística d’Asturies, nun quier dar sólo noticies n’asturianu. L’idioma d’Asturies nun pue seguir relegáu a un segundu planu dientro de la cultura asturiana, l’idioma d’Asturies debe ser l’actor principal y la pieza clave que cohesione la cultura asturiana. En 7dies.org l’asturianu conviértese na llingua vehicular en tola so dimensión y va tomase en valor y da-y l’alcance y modernidá de cualquier otra llingua.

Los promotores de 7Díes quieren aprovechar el presente editorial pa saludar a toles persones que s’averen a esta web y anímenles a crear una comunidá d’usuarios y a contribuyir al xorrecimientu de la web faciéndonos llegar la información d’interés pa la cultura asturiana.

Porque nun nos damos. Nun torcemos. A partir de güei, Asturies vuelve a contase n’asturianu.