EDITORIALSolidaridá colos futbolistes de fala castellana

Dende equí tola nuesa solidaridá con toos aquellos futbolistes que nun pudieron espresase en castellán na FIFA. Duel que te traten como un falante menor. Como si la to voz nun pesara. Como si la to hestoria valiera menos si nun se diz nuna llingua más grande. El castellán ye una llingua guapa, guapísima, y los sos falantes merecen un respetu.

Imaxina tar nún de los meyores momentos de la to vida, y nun poder usar la to llingua. Esa cola que dedicasti'l primer gol a la to madre, cola que ficisti reciella de guaḥe y llorasti de contentu na mocedá.... pero nun te dexen.

"Hay un idioma en el que todos nos entendemos".

Entós decáteste de too: Apláudese la diversidá, y la igualdá, pero "mejor déjalo para tu casa, anda"

Y ves cómo t'apliquen la igualdá y la diversidá cuando n'Asturies intentes presentar el TFG na Universidá n'asturianu y refúguentelu. Ves cómo t'apliquen la riqueza léxica, cuando te poníen multes por falar nel colexu, y los xueces dicíen que nun yera discriminatoriu. O ves cómo t'apliquen los drechos fundamentales cuando te dirixes a la Casa Conceyu, como ciudadanu, y refuguen el to escritu. O más sangrino.... cuando uses l'asturianu nel máster d'asturianu. O como cuando t'insulten peles redes "paleto, habla en el idioma en el que todos nos entendemos".

Cómo nun vamos solidarizanos con estes persones? Toles llingües tienen que tratase con respetu. Toes.

Toes, España? Sí, toes. La vuesa y la nuesa. La que lleváis negándonos dende l'entamu de la democracia.

A éstes altures la FIFA yá rectificó. Sicasí, equí, mañana, volveremos escuchar a los fascistes nel nuesu Parllamentu dicir les mesmes fascistaes, negándonos la oficialidá de nuesa llingua dende l'entamu de la democracia.

Porque'l respetu, señores, nun viaxa namái hacia arriba. Viaxa n'horizontal. O nun viaxa.