Los asturianos destinen yá'l 41% del so salariu al arriendu, cuatro puntos más que va un añu

Asina se desprende de l'informe de Fotocasa y InfoJobs qu'asitia a Asturies na llista de territorios au se supera en demasía la llende del 30% encamentáu polos organismos oficiales.

L'hestóricu amuesa cifres qu'abluquen, como que dende 2022 a 2024 los salarios namái xubieran un 7,4% mentanto que l'arriendu fízolo un 29,4%. Pero ye qu'esti añu 2025, la xuba de salariu mediu foi de un 1%, y l'arriendu un 6,9% sobre lo anterior.


Con un preciu mediu de 11,68 €/m² al zarru de 2025, l'arriendu añal d'un pisu tipu n'Asturies xube a 11.213 euros. Teniendo en cuenta que'l salariu brutu añal promediu n'Asturies asítiase en 27.619 euros (unos 2.302 euros brutos mensuales), los trabayadores tienen d'emplegar más de cuatro de cada diez euros de los sos ingresos puramente en costear la so vivienda. Esti incrementu evidencia una esmolecedora fienda ente la evolución de les remuneraciones llaborales y l'encarecimientu sosteníu del mercáu inmobiliariu asturianu.

A pesar de qu'Asturies presenta un esfuerzu menor que núcleos desaxeradamente tensionaos como Barcelona (76%) o Gipuzkoa (57%), la so situación allóñase del estragal de seguridá financiera al superalu en 11 puntos porcentuales.

Esti escenariu de "emerxencia habitacional" obliga a munchos asturianos a retrasar decisiones vitales como la emancipación o la formación de una familia. Según los responsables del estudiu, cuando'l costu de la vivienda absuerbe tala proporción del sueldu, compartir pisu dexa de ser una opción temporal pa convertise en una necesidá estructural, condicionando gravemente la seguridá económica y la movilidá llaboral de los trabayadores nel país.