Netanyahu viola l'altu'l fueu y ordena al exércitu asumir el control del 70% de Gaza

Benjamin Netanyahu ordenó al exércitu israelín asumir el control del 70% de la Faza de Gaza, una decisión que podría poner en peligru'l fráxil altu'l fueu algamáu va meses y agravar inda más la crisis humanitaria que vive'l territoriu palestín. La midida supondría una ampliación significativa de la presencia militar israelina nuna zona yá afarada pol conflictu y con una población sometida a condiciones estremes.

L'alcuerdu de tregua, impulsáu per Estaos Xuníos n'ochobre, establecía una llinia de separtación tres la retirada parcial de les tropes israelines, dexando baxo control direutu d'Israel daqué más de la metá de Gaza. De magar esa fecha, l'exércitu foi avanzando progresivamente escontra l'oeste, ampliando les árees consideraes d'esclusión y autorizando aiciones armaes contra cualquier persona qu'interpreten como una amenaza. Amás, nos últimos díes, milicies sofitaes per Israel participaríen nel desagospiu de civiles cercanos a la llinia d'altu'l fueu. Magar la tregua, los ataques y bombardeos siguieron en distintes partes de Gaza, causando centenares de muertes palestines dende l'entamu del cese d'hostilidaes.