Marina Pangua: "Tener ganao esti premiu ye ver el mio nome ente'l de grandes escritores qu'almiro"

Marina Pangua (Llanera, 1992) ganó con Bisarma'l XLVI Premiu de Novela Xosefa Xovellanos en 2025, espublizada recientemente pola editorial Trabe. Nesta entrevista fálanos del procesu creativu de la novela y la so vivencia personal.

¿Qué supunxo algamar el XLVI Premiu de Novela «Xosefa Xovellanos» en 2025 cola novela Bisarma?

Una allegría enorme y un gran honor. Tener ganao esti premiu ye ver el mio nome ente'l de grandes escritores qu'almiro. Amás, llevaba tiempu pensando qu'en cuasi cincuenta años de premiu, yá diba siendo hora que lu algamara una tercera muyer.

¿Recuerda'l momentu en que-y comunicaron el premiu?

Claro. Yo andaba nerviosa alrodiu la fecha na que suel anunciase la novela ganadora por si sonaba'l teléfonu. Cuando me llamaron taba nun autobús urbanu volviendo del ximnasiu pa casa. En cuantes descolgué, púnxime lloca de contenta y al mesmu tiempu diba esmolecida porque'l ruíu del autobús nun me dexaba escuchar la conversación cola claridá pola que naguaba yo pa saborguiar el momentu.

¿Por qué'l nome de Bisarma?

Ye una palabra bien guapa que remite a les pantasmes, a les ánimes. Comparte significáu con otra en francés que me cautivó de siempre: «revenant», lo que vuelve. Equí les bisarmes son eso que vien a visitanos dende otres vides. Aquelles coses de les que nun supimos o nun quiximos desfacenos.

¿Bisarma ye una novela con más buelga personal o recreación ficticia?

Tien más de ficción, anque cuido que na lliteratura los autores ponemos davezu más nuestro de lo que pensamos.

Los sos primeros pasos na escritura yá tán recoyíos n'antoloxíes como Escritores asturianes (2017). ¿Cómo siente qu'evolucionó hasta agora?

Daquella escribía testos cortos cuando yá me desbordaben pel pechu y me rezumíen de los deos. D'un tiempu a esta parte, deprendí tamién a comprometeme cola escritura d'una manera más reposada.

¿Cómo ye pa vuste'l procesu de creación? ¿Escribe d'una manera metódica con un fragmentu cada día o ye cuando siente la inspiración?

Depende de lo que tenga ente manes. Si ye una novela, impóngome una disciplina pa tar sollerte día tres día y asina ser quien a encauzala y sacala alantre.

¿Ta trabayando yá n'otra obra?

Dempués de publicar dos noveles en dos años, toi agora recargándome de llectures y de vida hasta que vuelva sentir la necesidá de tener por ello coles palabres.