A les 6:30h d'esti vienres alborecemos col cielu empuercáu de nubes altes ya con unes temperatures que tan alrodiu de los 12ºC, rexistrándose nel puirtu Payares 4,2ºC.
Güei vamos tener nubosidá media-alta entemecida ente dellos claros o abancios con aumentu de la nubosidá a partir del mediudía, pa dexanos el cielu nuble pela tarde. Les temperatures en llixeru ascensu, sobre too la sensación térmica al amenorgar l'aire.
El prósimu riscar un frente de precipitaciones va dexanos xarabatos frecuentes ya xeneralizaos de calter moderáu que durante'l día van ser menos frecuentes, más espacios y menos intensos con unes temperatures que van camudar poco calteniéndose un ambiente suave en xeneral, sicasí l'aire pue soplar con fuercia ya destemplar dalgo.
El domingu escamplará pero tendremos vientu gallegu fuerte, sobre too na primera metá del día que mos va dexar un ambiente más fresco a pesar del sol, amás nes primeres hores del riscar d'esti día pue nevar dalgo perriba de los 1800m al pasu d'un pequeñu frente.
El llunes alboreceremos con una baxada nidia de les temperatures ya col cielu empuercáu de nubosidá alta y asina va caltenese durante tol día.
Martes y sobre too miércoles el pasu d'una borrasca per Cantábrico va dexanos precipitaciones abondoses, descensu bultable de les temperatures y nevaes pela cordelera pero esto yá lu diremos viendo.
Que paséis un bon vienres collacies ya collacios.
Semeya que mos l'apurre la nuesa collacia Rocío Pinín.

—