Manifestación pola oficialidá de la llingua asturiana esti sábadu n'Uviéu

El mes de mayu de 1987 foi un momentu clave pal movimientu de defensa del asturianu: la Xunta pola Defensa de la Llingua Asturiana convocaba’l primer actu públicu en favor de la oficialidá del idioma. La respuesta ciudadana superó toles previsiones y aquella convocatoria acabó convirtiéndose, esi mesmu día, na primer manifestación pola oficialidá.

Cuasi cuatro décades dempués, la organización sigui sacando la reivindicación a la cai, como vien siendo habitual dende entós. La Xunta convoca una nueva manifestación pa esti sábadu 9 de mayu, a les 12:00 hores, n’Uviéu. La marcha partirá dende la Estación del Norte.

Fundada en 1984, la Xunta pola Defensa de la Llingua Asturiana ye una de les principales entidaes del país na defensa y promoción del asturianu.