Los bonos del programa de compres pa sofitar el pequeñu comerciu escosen el primer día

El programa Bono Comercio Asturias arrancó con una gran acoyida tanto per parte de la ciudadanía como del texíu comercial. Los 300.000 bonos puestos a disposición del públicu escosaron el mesmu vienres 1 de mayu, día en que s'abrió'l plazu de descarga. En total, 60.000 persones descargaron los bonos, lo que confirma l'eleváu interés por esta iniciativa del Gobiernu d'Asturies, diseñada pa sofitar al pequeñu comerciu y dinamizar el consumu llocal.

Según informa la conseyería en nota de prensa, la campaña algama nesta edición una cifra récor de participación, con 1.317 establecimientos adheríos repartíos per 38 conceyos asturianos. Son 123 comercios más que l'añu pasáu y sumen tres nuevos conceyos: Cuaña, Muros del Nalón y Ribadeva. Esta amplia implantación territorial y sectorial facilita l'accesu de la ciudadanía al programa y refuerza'l so impactu económicu.

Por conceyos, los que concentren un mayor númberu d'establecimientos participantes son Xixón (486), Uviéu (187), Avilés (132), Llangréu (60), Siero (56), Mieres (43) y Villaviciosa (34). El plazu pa realizar compres con descuentu va permanecer abiertu hasta'l 30 de xunu. El llistáu de los comercios participantes pue consultase na web de bonoscomercioasturias.com.