Sanidá aprueba l'ampliación del peñeráu de cáncer de mama a muyeres d'ente 45 y 74 años

La Comisión de Salú Pública aprobó l'ampliación del programa de peñeráu poblacional de cáncer de mama del Sistema Nacional de Salú pa incluyir a muyeres de 45 a 74 años. Hasta agora, la cartera común de servicios contemplaba una mamografía cada dos años pa muyeres de 50 a 69 años; la nueva propuesta caltién esa periodicidad biañal pa tol nuevu rangu d'edá.

Sanidá desplica que la midida respuende a los encamientos de la Rede d'Axencies d'Evaluación de Teunoloxíes Sanitaries y del Conseyu de la Xunión Europea, asina como a la evidencia clínica disponible. Según la nota, alredor del 10% de los cánceres de mama n'España diagnostíquense en muyeres menores de 50 años. La decisión tamién se sofita na esperiencia de comunidaes como Navarra, Castiella y Llión, La Rioxa y Castiella-La Mancha, que yá incorporaron el tramu de 45 a 49 años, y en datos de Galicia pal grupu de 70 a 74 años.

La implantación va ser progresiva: les comunidaes y ciudaes autónomes van tener hasta trés años pa empecipiar el cambéu del programa y hasta seis años p'algamar una cobertoria d'invitación cercana al 100% nos nuevos grupos d'edá. L'impactu presupuestariu envaloráu pal SNS xube a 534 millones d'euros entre 2025 y 2029, anque Sanidá preve que'l costu real seya menor porque delles comunidaes yá empezaron a ampliar los sos programes.