La Fundación Belenos llanzó'l númberu 44 de la revista "Asturies. Memoria encesa d'un país."

La Fundación Belenos llanzó a principios d'añu'l númberu 44 de la so revista Asturies. Memoria encesa d'un país, publicación cultural y etnográfica n'asturianu dedicada al estudiu, preservación y difusión de la cultura asturiana, especialmente la hestoria, la tradición oral, la etnografía, l'arqueoloxía, la música tradicional, la mitoloxía y la identidá cultural d'Asturies.

Disponible a la venta na so web, la Fundación Belenos, según informa na mesma y que nació oficialmente en 1983 como Coleutivu d'Estudios Etnográficos Belenos, ye un enfotu de delles persones que, énte'l sentimientu de pérdiga del patrimoniu cultural asturianu que yá se taba esperimentando daquella, entamaben unos años enantes, de manera individual, a facer trabayu de campu n'estayes estremaes de la cultura tradicional asturiana col envís d'estudiar y dexar memoria de lo que sentíen como parte de la identidá del país. Esi ye l'oxetivu principal del coleutivu, qu'adoptó la forma de fundación en 1998: “l'estudiu, conservación y espardimientu de la cultura asturiana en toles sos manifestaciones, especialmente aquelles constitutives del so corpus tradicional y del so patrimoniu cultural célticu, tanto nel ámbitu territorial del actual Principáu d'Asturies como n'otros territorios arreyaos hestóricamente”, xera que lleva faciendo, de manera ininterrumpida, nes últimes cuatro décades.