¿Camientes que la IA cubre toles necesidaes humanes?

Millones de persones interactúen acaldía con sistemes conversacionales, non solo pa resolver duldes o aumentar la so productividá, sinón tamién pa desfogase, acuriosar pensamientos o sentise acompañaes. Sicasí, hai elementos fundamentales que nun apaecen nesti tipu d'interacción y que son clave pal desendolcu psicolóxicu.

El primeru ye la reciprocidá real. Nuna relación humana, l'otru nun ta ende solo pa responder. Tamién tien necesidaes, puede retirase, puede nun entendenos o puede nun tar d'alcuerdu. Esa interdependencia ye parte esencial del venceyu.

El segundu ye'l conflictu. Anque tendamos a evitalu, el desalcuerdu, la frustración y la necesidá de negociación son contestos onde se ponen en xuegu habilidaes fundamentales: tolerancia a la frustración, regulación emocional, empatía recíproca y corregulación interpersonal. Nes relaciones humanes, el conflictu obliga a axustar la mesma respuesta al estáu emocional del otru. Les interacciones con IA, sicasí, tienden a amenorgar esta fricción: non solo faciliten la conversación, sinón que dacuando mengüen la esposición a información incómoda o discrepante. Esa “fricción de verdá” ye precisamente una de les dimensiones problemátiques de la bautizada n'inglés como AI sycophancy –“adulación de la IA”–, entendida como l'enclín de los modelos de llinguaxe a tar d'alcuerdu, afalagar y validar al usuariu.

El terceru ye la reconocencia xenuina. Ser validáu por otra persona implica una continxencia real, podría nun asoceder. Esa posibilidá ye lo que da valor a la reconocencia. Nuna IA, la validación ta garantizada por diseñu. Nun hai riesgu de refuga, pero tampoco autenticidá en sentíu estrictu.

Llea l'artículu completu en theconversation.com. Estes llínies son un estractu del orixinal "Estas son las funciones sociales y emocionales que nunca podrá cubrir un chatbot" d'Oliver Serrano León, direutor y profesor del Máster de Psicología General Sanitaria de la Universidad Europea.