Asturies celebra'l Día Mundial de la Sidra

Esti 3 de xunu, Asturies vístise de gala pa festexar el Día Mundial de la Sidra, una xornada que cobra anguaño un significáu inda más especial. Trátase del segundu añu que se celebra esta efeméride desque la UNESCO declarara la «Cultura sidrera asturiana» como Patrimoniu Cultural Inmaterial de la Humanidá n'avientu de 2024, una distinción que punxo en valor unes práutiques que se remonten, polo menos, a l'Alta Edá Media.

El programa d'actos pa güei ye intensu y repartíu por tola xeografía. El puntu de partida tuvo llugar a les 12:00 hores nel Muséu de la Sidra d'Asturies, en Nava, onde se celebró l'actu simbólicu d'escanciar un culín, entamáu pola Federación Asturiana de Conceyos, el Conseyu Regulador de la DOP y la Fundación de la Sidra.

Pela tarde, la actividá treslládase al Paraninfu de la Laboral Ciudá de la Cultura, en Xixón. A partir de les 17:30 hores, una mesa redonda analizará la cultura sidrera con expertos como Luis Benito García o María Cardín, siguida de la proyeición de material audiovisual inéditu de los años 20 sobre la ellaboración de la sidra, acompañáu por música en direuto de Forma Antiqva. La conseyera de Cultura, Vanessa Gutiérrez, va ser la encargada de clausurar l'actu con un brindis coleutivu.

Pero la fiesta nun se queda solo n'Asturies. El Principáu entamó tamién una espicha tradicional en Madrid a les 20:00 hores pa compartir esta cultura colos profesionales y autoridaes de la capital. Mentanto, en Tiñana (Siero), va inaugurase un nuevu llagar de Campoastur a les 19:30 hores, reafirmando la vitalidá d'un sector que ye símbolu d'identidá.

La sidra n'Asturies va muncho más allá de lo material. Según destaca la UNESCO, constitúi un sentimentu de pertenencia a la comunidá y refléxase nun vocabulariu específico na nuesa llingua. Los rituales de consumu comunal y l'escanciáu son señes d'identidá que fomenten la integración social y caltienen vivos los paisaxes rurales.

Anque güei ye'l día grande, los actos van siguir a lo llargo de la selmana. Ente les cites más destacaes, la Biblioteca d'Asturies ufierta un panel onde se pueden escuchar doce tonaes dedicaes a la sidra al traviés de códigos QR. Amás, la fin de selmana que vien va haber talleres pa families nel Centru Tito Bustillo, de la cueva d'El Pozu'l Ramu, y nel Muséu del Xurásicu, onde se va proyeutar el documental La gran manzana.