¿Crees que'l xabón d'Heno de Pravia ta venceyáu realmente a Pravia?

Pa munchos asturianos, Heno de Pravia ye muncho más qu'un xabón: ye un arume asociáu a la infancia, a los llares d'otres dómines y a una de les marques más reconocibles del país. Sicasí, lo que non tol mundu sabe ye que'l nome nun foi una invención comercial nin una denominación escoyida al azar. Heno de Pravia, sí, fai mención espresa a la nuesa llocalidá asturiana de Pravia.

La rellación ente Pravia y el famosu xabón nació a entamos del sieglu XX. La hestoria arranca en 1903, cuando l'empresariu irunés Salvador Echeandía Gal, nun viaxe per Asturies, quedó cautiváu pol arume de la yerba recién segao nos campos pravianos. Aquella impresión inspirólu pa crear un arume que remembrara esi arrecendor tan carauterísticu y, poco depués, llanzó al mercáu'l xabón qu'acabaría convirtiéndose nun iconu de la hixene. La empresa responsable foi Perfumería Gal, fundada pol mesmu Salvador xunta a Lesmes Sainz de Vicuña Arrascaeta.

L'ésitu d'Heno de Pravia foi estraordinariu gracies a la calidá del productu y a una innovadora estratexa publicitaria que convirtió la marca nuna de les más reconocíes. Más d'un sieglu depués, el xabón sigue siendo unu de los grandes clásicos de la empresa y el consumidor continúa asociando'l nome de Pravia a un arume que delles xeneraciones identifiquen al intre.

El venceyu entre la marca y la villa ye tan estrechu que, en xunu de 2000, Pravia rindió homenaxe a Perfumería Gal dando'l nome de Parque Heno de Pravia a unu de los sos espacios públicos. Nel actu participaron representantes de la compañía, ente ellos Juan Manuel Sainz de Vicuña, nietu d'unu de los fundadores.

El xabón nun se fabrica n'Asturies. La sede y la planta de producción de Perfumería Gal atópase n'Alcalá de Henares (Madrid), integraes dientro de les estructures del Grupo Puig que cuenta actualmente con siete fábriques operatives en tol mundu: dos nel Estáu (Madrid, Barcelona) y cinco nel restu del mundu.