Bruxeles encamienta a los países de la XE a activar enantes de fin d'añu l'aplicación europea de verificación d'edá

La nueva aplicación, que los países van poder llanzar como serviciu independiente o integrar na cartera europea d'identidá dixital, foi desenvuelta pola Comisión a nivel téunicu (el llamáu "plan direutor" o blueprint). Cada estáu miembru tien agora que personalizala y producila pa la so ciudadanía. La vicepresidenta executiva de Teunoloxía, Seguridá y Democracia, Henna Virkkunen, señaló qu'esta ferramienta constitúi "la siguiente pieza del puzzle" pa llograr un espaciu en llinia au los neños tean seguros y puedan actuar de forma positiva y responsable, ensin restrinxir nin acutar los drechos de los adultos.

La iniciativa enmárcase na Llei de Servicios Dixitales (DSA) europea, que yá esixe a les plataformes en llinia garantizar un altu nivel de privacidá y seguranza pa los menores. La principal novedá d'esti sistema ye que l'usuariu demuestra que cumple la edá riquida ensin necesidá de facilitar la so fecha de nacencia exauta, el so documentu d'identidá o cualesquier otru datu que pueda comprometer la so privacidá.

Bruxeles confía en que la interoperabilidá ente los distintos sistemes nacionales dexe que la verificación funcione en tola Xunión Europea. L'encamientu adoutáu güei nun ye venceyante, pero marca una fueya de ruta clara pa que los gobiernos entaínen y actúen con rapidez y la app tea operativa en tolos países primero que termine 2026.