Publícase l'ensayu ganador del II Premiu Yolanda Huergo

La obra ganadora del II Premiu Yolanda Huergo, convocáu pola Asociación Grana, tien por títulu Da-yos caña. El tiempu y el contestu d'una banda de Rock Astur, de la que ye autor Xune Elipe. Nella tán presentes campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes a nivel asturianu y internacional, que posibilitaron el surdimientu d'un grupu como Dixebra nuna ciudá como Avilés. Nesti sen, tener conocencia de la crisis del petróleu nos años 70, de la llegada de la democracia formal, del nacimientu del asturianismu contemporáneu, de la reestructuración del sector industrial, de la llegada del punk, de los medios alternativos de comunicación, del descubrimientu del nacionalitarismu llibertariu, del impactu de les drogues, del ambiente urbanu, de los conflictos llaborales, de la instauración del réxime autonómicu, del procesu de normativización del asturianu… va danos les claves de los porqués surde una formación musical como Dixebra y qué repercusión va tener too ello na so ideoloxía y mensaxe.

Nes sos páxines tóquense cuestiones de calter históricu, social, cultural o llingüisticu, entellazaes con anécdotes o referencies biográfiques. Sicasí, nun ye un exerciciu de señardá vacíu, saber d'au venimos va facilitanos conocenos meyor a unes xeneraciones de les clases populares y trabayadores asturianes marcaes y moldeaes por unos fechos concretos de la historia recién. Al empar, les nueves van tener la oportunidá de ser conscientes d'un periodu históricu crucial pa entender la sociedá asturiana d'anguaño y cómo foi dándose forma a los movimientos sociales y alternativos del nuestru país.

L'autor

Xune Elipe (Avilés, 1962) ye activista del movimientu de reivindicación llingüística dende mui mozu. Ye miembru fundador de la banda de rock Dixebra, con quien tien grabaos una quincena de discos. Creador del sellu discográficu L'Aguañaz, con más de setenta referencies editaes d'estilos estremaos. Ye'l reponsable de Goxe Producciones, empresa centrada nel ámbitu de la creación cultural asturiana y director del Anuariu de la Música Asturiana. Dirixó la serie documental D'ayeri a güei (TPA) sobre la historia de la música asturiana de magar hai rexistros sonoros, asina como responsabble del programa radiofónicu Al Son (RPA). Tien publicaos los llibros: Llingua y rock (1992), Rockmería. Un repasu a la música popular del sieglu XX (2009), Dende la Casa Conceyu (2019) y Hai una llinia trazada. Historia de la música asturiana (XXVI Premiu d'Ensayu "Máximo Fuertes Acevedo", 2022).