Una cai en Xixón pa Igor Medio

El Conceyu de Xixón abrió la consulta pública previa pa modificar la denominación de la cai Palafox, na redolada de Naval Azul, y que pase a denomase cai Igor Medio. El trámite figura nel espediente municipal 50889M/2026 y da continuidá al procesu anunciáu pol Consistoriu pa rindir homenaxe al artista xixonés.

La propuesta llega nel añu nel que se cumplen dos décades de la muerte d'Igor Medio Tuya, nacíu n'El Natahoyo en 1972 y fináu en 2006. Músicu, dibuxante y miembru de Felpeyu, Medio foi una figura especialmente querida na cultura asturiana y nel so barriu, onde dexó una buelga que foi muncho más allá de la so obra artística.

El Conceyu yá avanzara en marzu que l'actual cai Palafox camudaría de nome a partir de xunu, dempués d'un actu d'homenaxe póstumu impulsáu xunto a la familia del creador. Según la información municipal recoyida entós, la midida nun supondría perxuiciu postal pal vecindariu de la zona.

Con esti cambéu, Xixón busca incorporar al caleyeru la memoria d'un artista venceyáu El Natahoyo y a una xeneración qu'anovó la música asturiana dende la tradición y la mirada contemporánea. La futura cai Igor Medio va ser, amás d'una denominación urbana, una reconocencia pública a una persona recordada con ciñu polos que compartieron con él barriu, escenariu y vida cultural