La xixonesa Azahara Cañedo, nueva direutora de la RTPA

La Xunta Xeneral aprobó esti miércoles la designación de la periodista xixonesa Azahara Cañedo Ramos como nueva direutora xeneral de la Radio Televisión del Principáu d'Asturies (RTPA). La so candidatura salió alantre en segunda votación, na que bastaba mayoría absoluta, con 23 votos de PSOE, Convocatoria por Asturies y la diputada del Grupu Mixtu Covadonga Tomé. PP y Foro optaron pol votu en blancu, con 18 papeletes, mientres que la ultraderecha española votó nulu.

Cañedo llega al cargu tres nun algamar na primer votación la mayoría cualificada de 30 diputaos desixida primeramente. Sustitúi a Francisco Orejas, que dexó la direición del ente públicu en presentando'l so arrenunciu en xineru pa xubilase. La so eleición zarra asina'l relevu al mandu de una RTPA qu'encara una nueva etapa marcada pol futuru contratu programa, la situación llaboral interna y l'alderique sobre'l papel del mediu públicu na sociedá asturiana.

La nueva direutora ye llicenciada en Comunicación Audiovisual pola Universidá Carlos III, doctora n'Investigación en Medios de Comunicación y profesora na Universidá de Castiella-La Mancha. La so trayeutoria académica tuvo bien venceyada al estudiu de los medios autonómicos y sobremanera, a la televisión pública asturiana, que formó parte central de les sos investigaciones.

Na so comparecencia parllamentaria, la xixonesa defendió una RTPA con un plan estratéxicu a trés años y con mayor atención a la diversidá llingüística d'Asturies. Sobre la llingua asturiana y l'eonaviego, plantegó avanzar hacia una presencia más normalizada nel ente públicu, non solo como conteníos específicos, sinón tamién dientro del funcionamientu xeneral de la cadena. Tamién reconoció la necesidá de formación llingüística, incluyida la de so, pa encetar esi oxetivu con rigor.