Atopen los restos d'otres nueve persones na fuexa la Lloba, en Castrillón, colo que yá son 16 les víctimes desaterraes

La exhumación de la fuexa común de La Lloba, en Castrillón, permitió recuperar los restos de nueve persones más nun segundu tramu de la trinchera, llevando a 16 el númberu total de víctimes alcontraes hasta'l momentu. L'actuación forma parte de los trabayos impulsaos pola Direición Xeneral de Memoria Democrática, cola collaboración del Grupu Arqueos de la Universidá d'Uviéu, dientro de los llabores de recuperación de víctimes republicanes represaliaes mientres la Guerra Civil Española.

Mentanto una visita institucional a la zona, la viceconseyera de Derechos Ciudadanos, Beatriz González Prieto, destacó la relevancia de les meyores tanto dende'l puntu de vista téunicu como humanu, sorrayando la importancia qu'estos trabayos tienen pa les families que lleven años esperando la recuperación de los restos de los sos allegaos. Tamién recordó la necesidá de que más familiares participen nes pruebes xenétiques promovíes pol Institutu Asturianu de Memoria, col fin de facilitar futures identificaciones.

L'equipu arqueolóxicu atopó evidencies de la estrema violencia sofrida poles víctimes, ente elles impactos de bala na tiesta, signos d'achaplamientu provocaos por grandes piedres asitiaes sobre los cuerpos y restos d'alambres qu'indicaríen que delles persones foron maniaes. Xunto colos restos óseos, tamién apaecieron casquillos de bala y oxetos personales como botones, broches y trozos de ropa, elementos que refuercen la hipótesis de que les execuciones produxéronse en payares de 1937.

El direutor del Grupu Arqueos, Avelino Gutiérrez, esplicó que'l mal estáu de caltenimientu de los restos respuende tanto a la violencia exercida sobre los cuerpos como a les carauterístiques del terrén: "Ye mui acedu, ye una arcilla con un PH mui altu, que produz una disolución de los güesos progresiva, sobre tou cola humedá tan alta d'esti terrén, y too eso fai que la preservación de los güesos seya mui mala".
Nestos momentos ta faciéndose l'analís antropolóxicu de los restos recuperaos, una fase que se va enllargar hasta finales de mes enantes de siguir colos trabayos previstos pa mayu.