Completáu l'enanche de la ponte sobro'l ríu Naraval, en Tinéu, p'ameyorar la seguridá y la fluidez del tráficu

La ponte sobro'l ríu Naraval na carretera AS-219 (Ḷḷuarca - La Puela Ayande) yá cunta con una estructura que dexa enanchar la plataforma p'ameyorar les condiciones de seguridá y la fluidez del tráficu. Los trabayos p'asitiar les lloses prefabricaes que permiten ampliar la seición del tableru completáronse esta madrugada. La renovación de la ponte inclúise na inversión de más de 3,6 millones que'l Gobiernu d'Asturies tien en marcha p'acondicionar el tramu ente les llocalidaes de Navelgas y Naraval.

La instalación d'una grúa de 150 tonelaes pal izáu y allugamientu de les pieces obligó a parar el tráficu ensembre na vía mientres la nueche. La carretera caltiénse yá abierta, tres instalase un voladizu de 0,60 metros en cada marxe.

Una vegada asitiaes les lloses, dispúnxose'l rellenu de los estremos de la estructura con zahorra artificial pa permitir la reapertura al pasu del tráficu, desaniciando los pasos d'entrada/salida.

El proyeutu de meyora de los 3,75 kilómetros ente Navelgas y Naraval inclúi, amás, l'acondicionamientu de la carretera como travesía urbana nesta última llocalidá, pa lo que va dotase de ceres y va remozase la plataforma. L'actuación supón una sustancial meyora del trazáu de la carretera, que se va enanchar hasta los seis metros.

Les obres del tramu Navelgas-Naraval de la AS-219 súmase a los trabayos yá executaos na mesma vía ente l'altu d'Aristébanu- Naraval y Navelgas-Bárzana pa rehabilitar el firme con una nueva capa de rodadura. Esta actuación supunxo l'acondicionamientu de 14,3 kilómetros de la carretera. En total, destínense a la AS-219 más de 5,2 millones d'inversión, dientro de les actuaciones comprometíes pol Gobiernu d'Asturies dientro del programa del suroccidente.