El Gobiernu d'Asturies impulsa la inversión de cuasi 200.000 euros n'Amieva

La vicepresidenta del Gobiernu d'Asturies, Gimena Llamedo, y l'alcalde d'Amieva, Carlos Salazar, roblaron güei un conveniu que va dexar invertir 191.501 euros na meyora del aparcamientu y la seguridá nel accesu a la llocalidá d'Amieva, nel conceyu homónimu, y a les rutes de monte de la rodiada. L'actuación va financiase con fondos europeos Next Generation EU, nel marcu del Plan de Recuperación, Tresformación y Resiliencia.

Según informa la conseyería, la intervención va centrase n'estabilizar y ampliar la esplanada d'estacionamientu asitiada a la entrada del pueblu, un espaciu estratéxicu que da serviciu tanto a vecinos como a visitantes y que funciona como zona d'aparcamientu, área de maniobra pa vehículos de mayor tamañu, puntu de llegada d'escursionistes y allugamientu de servicios básicos. El proyectu va ayudar a correxir problemes d'eslizamientu del terrén, fortalecer la seguridá vial y peatonal y ordenar la llegada de visitantes nun enclave sometíu a una creciente afluencia turística.