El soterramientu del Muru de Xixón ye cada vez más real

La obra nel Muru de Xixón pretende establecer una amplia peatonalización en superficie, calteniendo un vial pa carga y descarga, residentes y servicios d'emerxencies. Los accesos realizaríense pela avenida de Castilla y la ponte del Piles, con una glorieta soterrada, y pola cai Juan Alonso. Tamién contempla una salida al traviés de Menéndez Pelayo.

Según informa'l Conceyu de Xixón, l'estudiu plantega dos alternatives: una de dos plantes d'aparcamientu con 933 places y otra de tres niveles, con 1.461 places. El costu de les obres, que duraríen ente 3 y 4 años, oscila ente los 120 y los 137 millones d'euros, con una aportación municipal d'hasta'l 25%, lo que supondría ente 30 y 34 millones d'euros. El restu del costu asumiríalu la empresa concesionaria, con una concesión d'hasta 36 años.