Una quema ambura dafechu una vivienda en Llangréu

Efectivos de Bomberos del Serviciu d'Emerxencies del Principáu d'Asturies (SEPA), con base nos parques de Samartín del Rei Aurelio y La Morgal, apagaron esta nueche, l'incendiu declaráu nuna vivienda allugada en Vega de baxo, La Felguera, Llangréu.

La suerte quixo que nun se rexistraren daños personales, magar que la vivienda, yera de dos altures y taba al llau d'otres viviendes cercanes.

El Centru de Coordinación d'Emerxencies del 112 Asturies recibió l'avisu a les 22.17 hores d'ayeri martes. Na llamada indicaben que taba amburando una casa de dos altures con viviendes adosaes.

Al llugar treslladóse una dotación, con cinco efectivos del parque de San Martín, un vehículu d'altor y unu de tresporte de personal, amás d'autobombes. Paralelamente tamién s'activó, de sofitu, otra dotación con dos efectivos del parque de La Morgal con una autobomba nodriza. Ente otres xeres tuvieron que retirar parte de la cubierta y el falsu techu pa contener el fueu.

A les 00.47 hores dióse por controláu l'incendiu y parte de la dotación de Samartín del Rei Aurelio tornó a la so base. El restu de personal quedó faciendo xeres d'enfriamientu y ventilación hasta les 02.20 hores.

Tanto a lo llargo de la nueche como a primer hora, por protocolu, los bomberos allegaron a revisar la quema cola cámara d'imaxes térmiques pa comprobar que nun hai reproducciones.

L'incidente comunicóse a la Policía Llocal, Nacional, Guardia Civil y a títulu informativu (yá que nun había afectaos) al Serviciu d'Atención Médica Urxente (SAMU).