El Ministeriu de Sanidá conclúi que nun esiste evidencia científica qu'avale la eficacia de la homeopatía en nenguna patoloxía

L'Axencia Española de Medicamentos y Productos Sanitarios (AEMPS) espublizó un informe téunicu tituláu "Homeopatía y productos homeopáticos: Evaluación de las evidencias acerca de su eficacia y seguridad", nel que se conclúi de forma categórica que nun esiste evidencia científica que respuenda pola eficacia de la homeopatía como preséu terapéuticu. Tres una revisión sistemática de la lliteratura científica y de les evaluaciones d'organismos estatales a nivel internacional, l'informe señala que los efeutos observaos son comparables al placebu.

L'informe, qu'analizó 64 revisiones sistemátiques publicaes dende 2009, destaca que la mayoría de los estudios que suxeren beneficios de la homeopatía presenten una baxa calidá metodolóxica, porque suelen tar invalidaos por amueses pequeñes, periodos de siguimientu curtios o sesgos na aleatorización. Amás, matiza l'estudiu, a midida qu'aumenta la calidá y el rigor de los ensayos clínicos, el supuestu efectu de la homeopatía mengua hasta esapaecer, informa'l Ministeriu de Sanidá.

Dende'l puntu de vista científicu, los principios de la homeopatía choquen coles lleis de la física y la farmacoloxía actual. En diluciones habituales como la 12 CH, que ye cuando s'entemez una parte de la sustancia orixinal con cien partes de disolvente dolce vegaes consecutives, ye matemáticamente imposible que quede una sola molécula del ingrediente orixinal nel preparáu, lo que fraya cualquier rellación de causa-efeutu ente'l productu y l'efectu terapéuticu.

Pa ilustrar esta desproporción, l'informe señala qu'una dilución de solo 6 CH (muncho menos estrema que la 12 CH) yá que equival a dilir un sobre d'azucre en tol mar Mediterráneu. Por esta razón, la AEMPS califica teoríes como la 'memoria del agua' -la creencia de que'l líquidu retién les propiedaes d'una sustancia, anque yá nun queden molécules d'ella- como postulaos ensin base empírica que desafíen el pensamientu científicu y racional.