La "fiebre" imparable d'Europa: el continente calezse al doble de velocidá que'l restu del planeta

Un nuevu y contundente informe de la Organización Meteorolóxica Mundial (OMM) y l'observatoriu Copernicus encendió toles alarmes. Europa ta caleciéndose dos vegaes más rápidu que la media mundial, tresformando'l continente nun fervideru de récords que tán poniendo en xaque los sos ecosistemes, la so agua y la so propia tierra.

L'estudiu, centráu nel añu 2025, describe un escenariu de "estrés térmicu" ensin precedentes. "Dende la década de 1980, Europa calecióse dos vegaes más rápidu que la media mundial", sorraya'l documentu como una de les sos conclusiones más dures. Pa que se faiga'l llector una idea, nel sur y l'este d'España rexistráronse hasta 50 díes más de lo normal nos que la temperatura "sentida" perpasó los 32°C. Inclusive, baxu'l Círculu Polar Árticu, na rexón de Fennoscandia (Finlandia, Suecia y Noruega ), los termómetros raspiaron los 35°C mientres una fola de calor de trés selmanes en xunetu.

Pero'l calor nun ye l'únicu síntoma d'esta fiebre. Les consecuencies estiéndense como un regueru de pólvora per tol continente. L'informe revela datos demoledores: alredor del 70% de los cursos d'agua d'Europa rexistraron caudales inferiores a la media mientres 2025, y el mugor del suelu algamó'l so tercer nivel más secu dende 1992. Esta seca, xunida a les temperatures abrasadores, dieron-y más gas a unes quemes forestales récord qu'afararon más d'un millón d'hectárees, una superficie mayor que tou Chipre.

Tamién les fondures marines sufren esta crisis. L'estudiu confirma qu'un 86% de les rexones oceániques europees sufrieron siquier un día de fola de calor "fuerte", batiendo récors. Estos episodios son especialmente dañibles pa ecosistemes vitales, como les praderíes submarines del Mediterraneu, qu'actúen como barreres naturales y son desaxeradamente sensibles a les altes temperatures. Na otra cara de la moneda, l'informe dexa una bona noticia: per tercer añu consecutivu, les enerxíes anovables superaron a los combustibles fósiles na xeneración eléctrica europea, algamando un 46,4% de la cuota, cola solar batiendo'l so propiu récor (12,5%).