Una nube solar moderada pue aportar a la Tierra esti 15 de mayu

El Centru de Predicción del Clima Espacial de NOAA/SWPC emitió una vixilancia por posible nube xeomagnética G2 pa'l 15 de mayu. Esta categoría considérase moderada y nun correspuende a un episodiu estremu. Según l'organismu, los posibles efectos concentraríense sobremanera en zones del planeta de llatitúes altes, abondo más cercanes a los polos que la península ibérica.

L'orixe del fenómenu ta nuna corriente rápida de vientu solar procedente d'un furacu coronal. Anque'l nome pueda sonar alarmante, nun se trata d'un furacu físicu nin d'un frayatu na superficie solar. Ye una zona de la corona del Sol onde'l campu magnéticu ta más abiertu y dexa que partícules cargaes escapen con mayor facilidá escontra l'espaciu.

Cuando esa corriente de partícules apuerta a la Tierra, pue interactuar col so campu magnéticu y provocar una nube xeomagnética. NOAA señala qu'esti episodiu podría causar pequeñes fluctuaciones en redes eléctriques, irregularidaes en satélites d'órbita baxa o problemes puntuales en comunicaciones de radio d'alta frecuencia, especialmente en llatitúes elevaes. Tamién podría favorecer aurores más al sur de lo habitual en Norteamérica.

Nesti puntu, ye conveniente desplicar que la tormenta xeomagnética ye la causa o'l marcu del fenómenu, y l'aurora boreal ye una de les sos manifestaciones visibles.

Pa la población xeneral, nun hai motivu d'alarma, nin ye catastrófico como se quier facer creer dende medios alarmistes: La Tierra cunta cola proteición del so campu magnéticu y de l'atmósfera, qu'actúen como escudu natural. En llugares como Asturies, lo normal ye qu'una nube G2 pase desapercibida na vida cotidiana. Trátase d'un fenómenu de clima espacial moderáu, xixiláu polos organismos especializaos, pero ensin efectos graves previstos.