El tardíu.... y últimu Campanu?

A la fin salió'l Campanu. El primer salmón de la temporada apaeció esti martes, 19 de mayu, nel ríu Seya, baxu la ponte de Villanueva, en Cangues d'Onís. Pescólu un vecín de Gamonéu, con mosca, a les 9:30 hores. L'exemplar, de más de 6 quilos, llega más d'un mes dempués d'abrise la temporada, una demoranza inédita que convirtió la tradición en síntoma d'alarma.

El retrasu confirma la esmolición de pescadores, científicos y colectivos conservacionistes: cada vegada remonten menos salmones, los ríos sufren más presión ambiental y el calentamientu de l'agua complica la supervivencia de la especie. Los espertos señalen un amiestu de causes —cambéu climáticu, degradación de hábitats, torgues fluviales, pesca nel mar y baxa reproducción—, pero coinciden en que'l salmón atlánticu traviesa una situación crítica.

L'Alministración asturiana queda agora énte una decisión incómoda: caltener la pesca con restricciones o avanzar escontra una veda total, como yá asocede n'otros territorios. Esti añu, amás, la tradicional puya del Campanu del Seya suspendióse. El pasáu 11 de mayu, el Conceyu de Cangues d'Onís decidió destinar los 2.500 euros (que de normal diben al pescador que se facía col Campanu), a l'asociación El Esmerillón, dedicada a la defensa y repoblación del salmón.