The Line, el fracasu d'un megaproyeutu

The Line yera un proyeutu urbanísticu xigantescu promovíu pol gobiernu d'Arabia Saudina dientro del plan NEOM. La idea consistía en facer una ciudá totalmente alliniada, d'unos 170 km de llargor por 200 m d'anchor, con edificios altísimos --hasta 500 m-- formando dos murios paralelos nel mediu del desiertu. Nun habría coches nin cais como les conocemos güei, porque tol movimientu diba facese per aciu del tresporte públicu rapidísimu y per caminos peatonales.

El proyeutu, anunciáu pol príncipe herederu Mohammed bin Salman, presentábase como una ciudá del futuru: sostenible, alimentada con enerxía renovable y diseñada p'agospiar millones de persones nuna franxa mui estrecha de territoriu ensin esparder urbanizaciones per tol desiertu.

El presupuestu inicial falaba d'un costu alredor de 500.000 millones de dólares, anque col tiempu dalgunes estimaciones llegaron a espillir la cifra hasta dellos billones. El problema foi que la idea acabó chocando cola realidá. El coste económicu empezó a espolletar ensin control, y munchos especialistes avisaron de que construyir una estructura tan llarga y tan alta yera una complicación enorme a nivel téunicu y loxísticu. Púnxose en dulda tamién que la xente quixera vivir nuna ciudá tan artificial y zarrada.

Col pasu del tiempu, les previsiones iniciales fueron amenorgando y el proyeutu perdió fuercia porque necesitaba inversión, materiales y tiempu insaciablemente. En 2025 replantegóse una nueva fase na que la llonxitú inicial prevista pasó unos 2,4 km y permitió ver a los analistes nesti cambéu'l fracasu d'una idea escomanadamente ambiciosa y poco vidable.