L'escritor Martín LópezVega va coordinar la Selmana de Les Lletres Asturianes de 2027, dedicada a Xuan Bello

El Gobiernu va dedicar la Selmana de Les Lletres de 2027 a Xuan Bello y va estender l'homenaxe mientres tol añu pa reconocer el so legáu lliterariu, llingüísticu y cultural. L'anunciu fízolu la conseyera de Cultura, Política Llingüística y Deporte, Vanessa Gutiérrez, mientres la inauguración del festival La Favorita en Ḷḷuarca. La programación prevista va a la gueta de poner en valor tantu la so obra como'l so papel como creador y dinamizador cultural.

Consideráu una de les voces más importantes de la lliteratura contemporánea en llingua asturiana, Xuan Bello publicó'l so primer llibru con namái 16 años y desenvolvió una amplia trayectoria como poeta, narrador, traductor y articulista. Entre les sos obres más destacaes figuren El llibru de Les cenices, Los nomes de la tierra y Hestoria Universal de Paniceiros, títulu que-y dio proyección nacional y que foi estremáu col Premiu Ramón Gómez de la Serna.

Nacíu en Paniceiros (Tinéu), en 1965, Xuan Bello ta consideráu una de les figures esenciales de la lliteratura asturiana contemporánea y unu de los autores que mayor promoción nacional ya internacional dio a la creación lliteraria en llingua asturiana. Poeta, narrador, ensayista, traductor y articulista, desenvolvió una obra fondamente venceyada a la memoria, el territoriu, la identidá y el poder evocador de la lliteratura como espaciu de resistencia cultural y emocional.