Nel primer trimestre, los incendios n'Asturies disparáronse nun 77% y la superficie quemao dóblase en 2026

Asturies ta entrando en 2026 con una señal d'alarma clara en materia de quemes forestales. En namái trés meses, de xineru a marzu, rexistráronse 281 quemes, frente a les 159 del mesmu periodu de 2025. Esto ye, hubo 122 quemes más, un aumentu del 76,7%. Pero'l datu más esmolecedor nun ye solo qu'ambure más vegaes el monte, sinón qu'ambura muncha más superficie: les hectárees quemaes pasaron de 945 a 2.304, lo que supón una medría del 143,8%. Dicho d'otra forma: nel primer trimestre de 2026 quemóse más del doble de terrenu que nel arranque del añu anterior.

El mes qu'esplica bona parte d'esti empeoramientu ye febreru. En febreru de 2025 hubo 24 quemes y amburaron 106 hectárees; en febreru de 2026 foron 126 quemes y 1.259 hectárees quemaes. Eso significa que'l númberu de fueos aumentó un 425% y la superficie afectada creció en redol a un 1.088%. Son cifres que tendríen de sirvir pa tomar conciencia: cuando les quemes se multiplíquen y, amás, cada una afecta a más terrenu, el problema dexa de ser una socesión d'episodios aisllaos y pasa a convertise nun síntoma de deterioru ambiental, de mayor vulnerabilidá del territoriu y de peores condiciones pa frenar el fueu.

📷 SOCIEDAD ASTURIANA DE ESTUDIOS ECONÓMICOS E INDUSTRIALES
La superficie media por quema tamién confirma esi enclín. Nel primer trimestre de 2025 cada fueu quemó de media 5,94 hectárees; en 2026, la media xubió a 8,20 hectárees, un 38% más. Esto quier dicir que les quemes non solo foron más numberosos, sinón tamién más dañibles en conxuntu. Anque l'episodiu más estremu de la serie sigue siendo agostu de 2025, con 5.908 hectárees quemaes y una media esceicional de 71,18 hectárees por incendiu, l'empiezu de 2026 amuesa que'l problema nun se llinda a los grandes fueos del branu. La prevención, el cuidu del monte, la xestión del territoriu y la responsabilidá ciudadana son claves, porque cada hectárea amburada nun ye solo una cifra: ye suelu perdíu, biodiversidá estropiada, paisaxe degradáu y un país que se vuelve un pocu más fráxil.

La esmolición nun se llinda a Asturies. El Ministeriu del Interior decidió adelantrar al 1 de xunu l'entamu de la campaña estatal braniega contra quemes forestales, per segundu añu consecutivu, pa garantizar que los medios tean dafechu operativos enantes de la fase de mayor riesgu. La decisión tomóse tres evaluar la evolución del riesgu de cara al branu, nun contestu marcáu por más quemes, mayor complexidá, previsión de temperatures más altes de lo normal y aumentu del estrés hídricu.

Según Protección Civil, entre'l 1 de xineru y el 15 de mayu de 2026 comunicáronse 127 quemes frente a 40 nel mesmu periodu de 2025, una medría del 218%. El balance estatal de 2025 ayuda a entender por qué estes cifres tienen de lleese como una alvertencia: Esi añu amburaron n'España 354.793 hectárees, más del triple de la media de la última década, en 8.189 quemes. Protección Civil contabilizó 63 grandes quemes forestales, responsables del 86% de la superficie xamuscada, con especial incidencia en Castiella y Llión, Galicia y Estremadura. Les consecuencies foron tamién humanes y sociales: ocho persones morrieron, 86 firíes y más de 42.000 evacuaes.

L'episodiu más críticu concentróse n'agostu, cuando la simultaneidá de fueos obligó a activar el Plan Estatal en fase de preemerxencia y a solicitar sofitu internacional. Lo qu'amuesen los datos d'Asturies y los del conxuntu del Estáu ye un mesmu enclín: les quemes yá nun son solo más frecuentes, sinón más graves, más difíciles de contener y con mayor capacidá d'alteriar la vida de miles de persones.