Caravia va instalar un "Smart Parking" nos aparcamientos de la Sablera de La Espasa, Morís y Moracey

El Conceyu de Caravia va poner en marcha un sistema intelixente de control d'aparcamientos en delles zones turístiques del conceyu coles mires d'ameyorar la movilidá y amenorgar les retenciones mientres los periodos de mayor afluencia. El proyeutu contempla la instalación de cámares de contéu de vehículos y paneles informativos nos aparcamientos de la sablera de La Espasa, Morís y Moracey, dientro del Plan Territorial de Sostenibilidá Turística financiáu con fondos europeos Next Generation.

L'actuación va permitir conocer en tiempu real el nivel d'ocupación de los parkings per aciu de teunoloxía d'analís de tráficu, amosando la disponibilidá de places en paneles electrónicos asitiaos en puntos estratéxicos. Según la documentación municipal, el sistema va usar cámares IP con intelixencia artificial pa contabilizar entraes y salíes de vehículos, evitando la identificación de matrícules o les cares de los ciudadanos y cumpliendo midíes de privacidá pa los usuarios.

La llicitación del proyeutu foi publicada a finales de marzu y l'actuación figura yá como axudicada. El sistema busca facilitar l'accesu a les sableres y amenorgar el tráficu innecesariu, especialmente pel branu, dexando a vecinos y visitantes conocer l'estáu de los aparcamientos enantes de llegar a les zones más saturaes del conceyu.