L'Ayuntamientu d'Uviéu plantegó la espulsión y llegó a suxerir una multa de 12.000 € a les casetes de les Fiestes Populares en San Mateo

Les fiestes de San Mateo d'Uviéu tuvieron siempre a los colectivos sociales y al movimientu asociativu y deportivu del conceyu como una parte importante del so día a día. Foi nel añu 2021 cuando'l gobiernu llocal d'Alfredo Canteli dio un xiru a la organización del eventu, plantegando la eliminación de los chiringuitos tradicionales de les entidaes sociales del conceyu, a favor d'un modelu de xestión que favorecía los plantegamientos d'OTEA, entidá qu'axunta a parte del sector hosteleru d'Asturies.

Foi a finales del mes d'abril del pasáu añu cuando se fixo pública la esistencia d'un espediente sancionador per parte del Conceyu d'Uviéu escontra cuatro casetes, lo que podría implicar la so espulsión de les fiestes y una multa de 3.000 € por caseta. La razón señalada foi la proyeición d'una bandera de Palestina na fachada de la Catedral d'Uviéu en señal de solidaridá col pueblu palestín.

Selmanes dempués de trescender la polémica, dende l'equipu de gobiernu del conceyu fízose públicu que l'espediente finalmente nun diba salir alantre. Sicasí, el plantegamientu inicial d'espulsión y sanción foi interpretáu como un avisu políticu a la participación de los movimientos sociales nes fiestes de San Mateo.