Manifestación pola oficialidá del asturianu

El próximu sábadu 9 de mayu, a les 12:00 del meudía, la Xunta pola Defensa de la Llingua Asturiana convoca una nueva manifestación pola oficialidá del asturianu. La cita va salir de la Estación del Norte, n'Uviéu.

La llingua asturiana sufre una discriminación estructural al nun tener oficialidá, lo que se traduz nuna falta de derechos reales pa los sos falantes: nun ta garantizada la so presencia obligatoria na alministración, na xusticia nin na educación, lo que provoca que munches persones nun puedan usala con normalidá nin ser atendíes nella. Esta situación xenera una desigualdá clara frente a otres llingües del Estáu que sí son oficiales, y contribúi al so desprestixu social, abandonu y escaezu, como si fuera una llingua de menor valor o utilidá. Amás, la falta de protección llegal torga la so tresmisión xeneracional y favorez la perda progresiva de falantes, nun procesu que nun respuende a una falta d’interés cultural, sinón a decisiones polítiques que la dexen nuna posición de desventaxa.

N'acabando la manifestación na Plaza La Escandalera, va haber l'actuación del grupu de música tradicional feminista "Nun tamos toes", un conxuntu de muyeres que tienen como seña d'identidá la pandereta, el panderu y la creación de lletres nueves adaptaes a los tiempos y les reivindicaciones de güei.

La Xunta pola Defensa de la Llingua Asturiana ye una organización que trabaya pola defensa del asturianu dende l'añu 1984.