Especialidá Docente pal profesoráu d’asturianu, les claves d’un conflictu llaboral

La creación de la Especialidá Docente pal profesoráu d’asturianu y eonaviego/gallego-asturiano ye ún de los principales oxetivos d’ADAE, l’Asociación de Docentes d’Asturianu y Eonaviego/Gallego-asturiano, dende la so fundación nel añu 2024. La reivindicación, de 332 docentes, va más allá d’una cuestión estrictamente llaboral: la situación repercute tamién na estabilidá y calidá de la enseñanza d’una asignatura con más de 30.000 estudiantes n’Asturies.

Una interinidá permanente: “docentes de segunda categoría”

El profesoráu d’asturianu y eonaviego/gallego-asturiano ta anguaño nuna situación d’interinidá permanente a lo llargo de tola so carrera profesional. Magar cuenten cola mesma formación académica y asuman les mesmes responsabilidaes que’l restu del profesoráu —tutoríes, coordinación de proyectos educativos o docencia nes distintes etapes—, sufren una discriminación llaboral estructural.

Hai cuatro factores principales qu’espliquen esta degradación llaboral:

Per una parte, esti profesoráu nun tien posibilidá d’algamar una plaza fixa, tando condenaos de manera indefinida a una situación d’interinidá. Per otra, cada 31 d’agostu cesa nel so puestu y vese obligáu a volver escoyer destín, lo que supón cambios constantes de centru y, munches vegaes, de conceyu. Un mesmu docente puede poner clas un cursu en Degaña y al siguiente en Llanes.

A ello súmase la elevada presencia de contratos a media xornada, con repercusiones direutes sobre’l salariu y la conciliación familiar. Finalmente, el colectivu nun tien posibilidá d’actualizar méritos y acumular puntuación pa optar a meyores condiciones llaborales, al contrariu de lo que ocurre col restu del profesoráu.

La consecuencia ye que maestros y profesores pueden encadenar años de trabayu ente distintos centros educativos, con contratos parciales y movilidá constante d’una punta a otra d’Asturies, ensin nenguna posibilidá de meyora nes sos condiciones llaborales.

Efectos na enseñanza: menos continuidá y más dificultaes pal alumnáu

La problemática nun perxudica namás a los docentes. La inestabilidá llaboral repercute direutamente nel desenvolvimientu de l’asignatura y nel procesu de deprendizaxe.

L'alternancia continua del profesoráu dificulta la creación de referentes estables pa l’alumnáu, amenorga la continuidá de proyectos educativos nos centros y puede provocar una perda de valor percibíu de la materia nel sistema educativu.

El papel del Ministeriu: tres reales decretos y la falta d’oficialidá

La principal torga señalada pa crear la Especialidá Docente ye la ausencia d’oficialidá del asturianu. Sicasí, ADAE argumenta que la actual LOMLOE permite la enseñanza del asturianu y eonaviego/gallego-asturiano anque nun tengan reconocimientu oficial.

Una cambiu na redacción de tres reales decretos estatales —el 1834/2008, el 1594/2011 y el 287/2014— bastaría pa que’l Principáu pudiera crear automáticamente y con cobertura llegal la especialidá docente.

Meses de movilizaciones y negociaciones abiertes

ADAE lleva meses desarrollando un calendariu de movilizaciones pa reclamar soluciones. Concentraciones, enzarros, xuntes cola Conseyería d’Educación d’Asturies, alcuentros nel Ministeriu d’Educación en Madrid y contactos con distintes fuercies polítiques formen parte de les actuaciones que lleva alantre'l colectivu.

Anguaño les conversaciones col Principáu y col Ministeriu siguen abiertes, al empar que les movilizaciones siguen como midida de presión pa llograr la Especialidá Docente.