Firíu un varón arrolláu por un tren en La Pola Siero

Un varón resultó firíu grave en siendo arrolláu por un tren, por causes desconocíes, al altor d'un pasu a nivel en La Pola, Siero, según los datos facilitaos pol Serviciu d'Atención Médica Urxente (SAMU)

El Centru de Coordinación d'Emerxencies recibió l'avisu a les 16:01 hores. Nel avisu fechu por Adif indicóse qu'una persona fuera arrollada por un tren y taba atrapada. Al momentu movilizóse al Xefe de Bomberos de la Zona Centru xuntu a 11 efectivos de bomberos del Serviciu d'Emerxencies del Principáu d'Asturies (SEPA ) con base nos parques de Llamorgal y Samartín del Rei Aurelio.

Una vegada na zona, los bomberos comprobaron que'l varón taba atrapáu por una estremidá. Nesi momentu solicitóse'l corte de la tensión eléctrico de la catenaria, y la dotación trabayó conxuntamente col equipu sanitariu, presente nel llugar, pa estrayer al afectáu atrapáu.

La sala del 112 del SEPA informó del socesu a la Policía Nacional y Policía Llocal, amás d'al SAMU qu'activó la UVI Móvil d'Uviéu y l'ambulancia de soporte vital básicu y l'equipu médicu d'atención primaria polesu