Emerxencia de salú pública pol virus del Ébola

A principios de mayu, un hospital de la Zona Sanitaria de Bunia, nel nordés de la República Democrática d'El Congu, detectó un biltu d'una enfermedá grave ente trabayadores sanitarios. Anque les primeres prebes refugaron el virus del Ébola, análisis posteriores confirmaron que'l causante yera'l virus Bundibugyo, una variante del Orthoebolavirus que puede provocar la enfermedá del Ébola n'humanos. Anguaño nun esiste vacuna específica contra esti virus y el tratamientu llimítase a curiaos paliativos. Los pacientes presentaron síntomes típicos del Ébola, como fiebre, voltures, debilidá intensa, dolor abdominal y hemorraxes.

Hasta'l 16 de mayu confirmáronse 8 casos en llaboratoriu, amás de 248 casos sospechosos y 80 muertes sospechoses, con una tasa de mortalidá averada del 32%. La mayoría de los afectaos tienen entre 20 y 39 años y dos tercios son muyeres. Amás, un paciente viaxó dende la RDC a Uganda, onde enfermó y finó; les autoridaes ugandeses confirmaron que morrió por Ébola. Anque un contactu d'altu riesgu permanez aislláu, hasta agora nun se detectaron contaxos llocales n'Uganda.

Tedros Adhanom, Direutor Xeneral de la Organización Mundial de la Salú (OMS), consultando colos Estaos Partes onde se sabe que se ta produciendo l'eventu, determina que la enfermedá del Ébola causada pol virus Bundibugyo na República Democrática d'El Congu y Uganda constitúi una emerxencia de salú pública d'importancia internacional, pero nun cumple los criterios d'emerxencia pandémica.