L'Executivu axudica la redaición del proyeutu pa construyir un nuevu vial d'accesu a Taramundi

La Conseyería de Movilidá, Mediu Ambiente y Xestión d'Emerxencies axudicó en 43.862 euros la redaición del proyeutu de construcción d'un vial que va ameyorar l'accesu a Taramundi a la empresa Integra Ingeniería S.L.

El nuevu trazáu, según nota de prensa de la conseyería, d'unos 300 metros de llargor, va conectar la carretera AS-21, A Veiga-Taramundi, col camín de Fonfría. L'iniciu va asitiase enantes del Hotel de La Rectoral p'aprovechar l'enanche esistente na zona onde s'atopa un llavaderu y l'accesu a un camín municipal en sentíu A Veiga-Taramundi-Galicia.

El proyeutu va ameyorar tamién el camín de Fonfría hasta l'avenida de Galicia y construyir una glorieta pa enllazar col AS-21. Esta rotonda va tener l'anchu necesariu pa dexar el xiru y l'encruz de vehículos pesaos.

Pela so parte, l'anchu de la calzada va ser de seis a siete metros y los carriles van midir trés metros en cada sentíu, amás de cuntar con un marxe adicional de mediu metru nes curves.